Самаре хьабийллар «ГӀалгӀайче. ГӀалай, говзача пхьарий мохк» яха гойтам
![Самаре хьабийллар «ГӀалгӀайче. ГӀалай, говзача пхьарий мохк» яха гойтам](http://serdalo.ru/storage/todgCXvICrpTVCGwfplsnOmDNLDpqzDd3oem5P7h.jpg)
Самарерча ГӀалгӀай культуран Деношта юкъе хьабийллар «ГӀалгӀайче. ГӀалай, говзанча пхьарий мохк» яха гойтам. Алабина цӀерах йолча исторен-мехктохкама музее хилар из йоккха кхетаче. Цига хьокха оттадир вай мехкарча цӀихезача суртанчаша, тайп-тайпарча оагӀон говзанчаша кхелла 189 болх.
«Гойтаме къамаьлдир ИЗО Паччахьалкхен музея кулгалхочун гӀонча йолча Хамхой Мадинас, мехкарча суртанчий Союза кулгал деча, халкъа суртанча волча Мартазанаькъан Мусас, культурани исторени гӀулакхех йолча Россе Юкъарча палатан комиссе кулгалхочун гӀонча волча Покровски Павла, иштта П. А. Алабина цӀерах йолча музея болхлочо Крамарева Иринас», - дийцар «Сердало» газетага республикерча паччахьалкхен музее.
ГӀалгӀай Паччахьалкхен 100 шу дизара хетадаь да гӀалгӀай культуран Самарера денош. Боккхача гойтаме хьокха оттадаьд вай къаман суртанчий, лакха начӀал долча говзанчий балхаш. Къаман истори, культура, Ӏадаташ довзийтаргда цар Самарерча бахархошта.