СВО ветеранаша мах оттабир, вай заман турпалхой суртий проекта
Гӏалгӏайчен Паччахьалкхен гойтама галерее хьабийллар «Культуран дӏоагӏа. Россе Турпалаш» яха гойтам, цига хилар республикан «Даьхен лорабой» ганза филиала социальни болх лелабу Тиймарзанаькъан Луиза, цунца бар лаьрххӏача тӏема операце ветеранаш. Гойтам хетабаь бар вай заман Даьхен бӏухошта - вай республикан бахархошта. Цига го йиш яр денал долча мехкахой сурташ, наггахьа мара нийслуш доаца тӏема сурташ, иштта довза йиш яр мехка кхоане бахьан долаш латаш барий истори.
«Ветеранашта из кхетаче лоархӏаме яр. Сурташка хьожаш бӏухошта дагаухар шоаш амал даь ха, тӏема новкъостий. Хӏара сурт гойташ дар машара мах мел ба. Царна бӏарахьежача бокъонца бола турпалхой, эздий кагий нах гуш хулар», - яхаш дийцар «Сердало» газетага Тиймарзанаькъан Луизас.
Цу проекта автора Пхьиленаькъан Заура керттера уйла яр, вай деношкара турпалал гойташ бӏухошта карагӏдаьнначоа терко тӏаяхийтар, исторически бакъдар лорадар.
