Гӏаракх яха гӏалай моттиг тоаеш къахьийгар мехка
Жӏайрахьа кхалерча Лаьжге боккха болх дӏабихьа меттайоалайир Гӏаракх яха гӏалай юрт. Цу беркатеча гӏулакха хетаяьча кхетаче дакъа лаца венавар мехкада Келаматанаькъан Махьмуд-ӏаьла, Паччахьалкхен Дума депутат вола Татренаькъан Муслим, «САФМАР» гӏо деча ганза хьалха латта Тӏумхой Микаил.
Ийс гӏала тхьоврача хана хиннача тайпара меттайоалаеш, къахьийгар болхлоша. Царна юкъера цаӏ тӏема гӏала я, пхиъ – нах бахаш хинна гӏалаш, иштта кхоъ малхара кашамаш. Из болх дӏахьош баьхкараша, цу моттиге гӏолла экскурси дӏахьош, дийцар хӏара гӏала малагӏа декхараш долаш хиннай. Цигарча бахархошца къамаьл деш, вай Мехкадас белгалдир, даьшкара хьакхаьча хӏама лакха терко еш лораде, хам бе безилга.
«Вай даьй денош дӏадаха, уж тайп-тайпарча хӏамаех лорабаь гӏалаш я уж. Тхьоврача шерашка баьхарий гӏулакхаш, ӏадаташ, къаман истори дисад царца. Тахан укхаза хьавеча кхетаду; хӏара тайп, фу укх гӏалашца дувзаденна доккха истори долаш долга. Наха дагадоагӏа мала мичахьа ваьхав, шоай даьй гӏулакхаш. Таханарча тӏехьен цу ханашка баьхачарцара вӏалла хадаргбоаца бувзам ба из», - белгалдир мехкадас.
Къаьстта баркал кхайкадир вай мехкадас цу доккхача гӏулакха хьалха латтача мецената Гуцаранаькъан Микаила. «САФМАР» тоабан, «Дийндалар» яхача ганза къахьегамца тахан лоамашка меттаоттаеш латтараш дукха гӏалаш я.
2023-ча шера дӏаболабир из боккха болх, 500 гӏала я цу юкъейодараш. Вай мехкара хьабоаккхача кхераца беш ба болх, хӏаьта «Тӏехьале» яхача тӏоговзанчий ишколо къаьнарча тайпара кхера билла ӏомабу говзанчаш. Гӏаракхага кхачале Кели, Тумагӏ, Фртуог,Гӏолашпхье яха гӏалай юрташ меттайоалаеш къахьийгар лоаме.
