Гӏалгӏайчен МКЖР хьабийллар инарала Цӏечой Мусайна хетабаь гойтам
Гӏалгӏай къам мехкахдаккхарах болча дагалоаттама мемориала доазон тӏа керда гойтам хьабийллар, «Даьхенна гӏулакх деш» яха цӏи йолаш. Таьрахьий гойтам хетабаь ба начӏал долча тӏема кулгалхочоа, инарал-майора Цӏечой Султана Мусай 80 шу дузаш хилара.
«Цига го йиш я цун тӏема никъ дӏаболалуш хинна ханаш. Киногойтамга гӏолла дийцар, цох инарал мишта хилар, Даьхенна гӏулакх деш волча хана цо даьхача толамех. Цӏечой Султана Муса - ӏӏӏ-ча дозала (1985) «СССР Герзашцарча Низашка амал дарах» яха орден лелаеш ва, иштта «Тӏема гIулакха тӏа карагӏдаьннарех» (1995) яха орден а елар цунна. Гойтам хетабаь бар цо дукхача шерашка дика Даьхен гӏулакх дӏахьош къахьегарах», - аьлар «Сердало» газетага Гӏалгӏайчен МКЖР.
Вахара никъ хургволча тӏема кулгалхочо дӏабихьар ший мехка гаьна волаш - из ваьв 1946 шера Казахстане. Цун вахарах лаьца кхы а дукха хӏама ха йиш я «Инарала сий» яхача биографически очеркага гӏолла. Цу материала кепа техар «Сердало» газета тӏа инарала юбилей йолаш, из а я цу гойтаме.
