«ДIадахача шера хIара цIен духьала егIаяр оаха лампаш. Бакъда, цу гIулаккхо ма хетта тоадинзар баьдеча урамий хьал. ДукхагIа йолча моттигашка лампа дIайогIа бIоагIаш дацар, хIаьта, цхьадараш бе-башха доацаш увттадаь латташ дар», — аьлар ший инстаграмм оагIон тIа юрта кулгалдеш волча Амринаькъан Ахьмада.

ХIанзолца из болх дIабахьара кулгалхошта хьалхашка лаьтта кхоачамбоацар — ахча ца хилар дар. Бакъда, тахан дагалаьттар кхоачашде аьттув баьлар юрташкара хьал тоадара оттаяь йолча программе гIолла. Цу беркатеча гIулакха шоашта могаш долча хIаманца гIо дир юрташкара хьал тоадарах болча кхуврча кулгалдеш волча Албакнаькъан Амира, Зязикнаькъан Амира, Дарсигнаькъан Мухьмад-Салес.

20 бIоагIа оттабаь дикагIа бола кхоачам юкъе бохийташ кхаь урама тIа 20 лампа оттайир болхлоша. Бахархошта йоккха гIозле хилар цу гIулакхах. Цул совгIа, свето хьадетта ахча а хIанз кердача лампашца кIезигагIа хургда.