Берда-Юрта кердача ишкола наӏараш хьайийллар, тов бетта 1-ча дийнахьа
01.09.2025 13:52
250 бера моттигаш луш йолча кердача ишколо ший наӏараш хьайийллар, Берда-Юртара эггара хьалхара хьаьший тӏаэцаш. Из хоам «Сердалога» бир мехка кабмино. Вай мехкада Келаматанаькъан Махьмуд-ӏаьла вар ишкол хьаеллача кхетаче. Кердача дешара шерца даькъалабийцар цо дешархой, хьехархой.
«Дега тоам беш да, укхаза бахача наха керда ишкол хьалъяр. Берий делар, гӏаддахар ма эшалда укх чу, дешара тӏакхе гӏерташ, къахьегаш хилва хӏаравар!» - аьлар мехкадас. Белгалде деза, къаьстта цу юрта керда ишкол хьаеллар доккха совгӏат долга. Берда-Юртара бахархой дукха хьийжабар цунга, хӏаьта тахан бераш а массавар а чӏоагӏа дог айденна ба.
Укх тӏехьарча шерашка мехка хьа мел йийлла ишколаш я, тӏехдика тоаяь, таханарча хано дӏадеххача тайпара кечъяь.
