12 шу даьнна бер, цӀеро доагадаь човнаш йолаш, Москве дӀадигар
28.07.2024 12:40
12 шу даьнна бер, 45% доагадаь човнаш хинна, ГӀалгӀайчера Москверча Г.Н. Сперанске цӀерагӀча дарбанчен берий центре дӀадигар.
«ГӀалгӀайчен берий республикански клинически дарбанче кхаьчадар из бер, геттара хала долаш. Лораша меттайоалайир цун могашал, цул тӀехьагӀа из, кхы гоа ца деш, Москве дӀадига лаьрхӀар. Оаха тхоашта могар ду, цу бера эшаш дола лорий новкъостал дара»,-аьлар унахцӀенон Министра Антошканаькъан Заремас.
Из бер вайцигара дӀадугаш бола болх шийна дӀатӀаийцар, цунна эшачунца гӀо дир ГӀалгӀайчен Кулгалхочо Келматанаькъан Махьмуд-Ӏаьлас.
Цо цӀаькха а хьагойт, къаьстта бераш дувцача хана, вахаре хьовзам хургбоацаш, лорадалар мел лоархӀаме да.
