31 шу хьалха хьакхеллар ГӀалгӀайчен Конституци
1994-ча шера саькур бетта 27-ча дийнахьа доккха, лоархӀаме гӀулакх хилар вай къаман истореца - дерригача къаман референдуме ГӀалгӀай республикан Конституци тӀаийцар. Вай Мехкадас Келаматанаькъан Махьмуд-Ӏаьлас белгалдечох, ГӀалгӀай паччахьалкхе хьаоттара наькъ тӀа лоархӀаме, боккха гӀа бар из.
Мехкахошка ше деча къамаьла юкъе республикан кулгалхочо хьоахадир, Конституци чӀоагӀъяьча дийнахьа денз, сага бокъонаш меттаоттаяра тӀехьа, иштта кхыйолча моттигий гӀулакх тоадеш мехка боккха болх дӀабихьалга. «Керттерча бокъон чудоагӀараш кхоачашдеш, паччахьалкхе чӀоагӀъеш, экономика, къаман культура, наьха вахара хьал меттадоаладеш, майрра гӀа боаккхаш йода тахан вай республика»,- аьлар Мехкадас.
Республикан кулгалхочо белгалдир, тахан шоай мехка хьал лорадеш санна, боккха мехка барт, цӀоагӀо, моаршо лораеш вай къаман нах латтилга. Керттерча бокъонца лерхӀам болаш, цо оттадаьраш лорадеш, дӀабаха безилга белгалдир Мехкадас.
