720 бера лаьрхӏа керда ишкол хьайийллар Йоккхача Ачалкхе
Магӏалбика кхале керда ишкол хьаеллаш йоккха кхетаче хилар укх деношка. Йоккхача Ачалкхе дахаш долча 720 бера моттигаш луш я из хоза, беркате ишкол. Вай мехкада Келаматанаькъан Махьмуд-Ӏаьла а хилар цига вена. Тӏема операцена юкъе вахар хаьдача цу юртарча бӏухочун Малорой Мусай цӏи лелаеш хургья ишкол. Тӏемахочун гаргара нах, из вовзаш, везаш хиннараш бар цига дакъа лоацаш.
«Вице-премьераш бола Кукурхой Адам, Балахайнаькъан Микаил, мехкадаь гӏонча Фаттахов Тимур, гӏишлон балхех йолча министерствон кулгалхо Иленаькъан Муса, дешареи ӏилмани гӏулакхех йолча Министерствон хьалха латта Цхьорой Ахьмад-Башир, Шолжа кхален, Магӏалбика кхален кулгалхой Татенаькъан Ӏийса, Къоастой Ӏаддал-Хьамид, «Даьхен лорбой» яхача ганза региональни филиала кулгалхо Абаьданаькъан Ислам, иштта кхыбола хьакимаш бар цига гулбенна хиннараш. Кхаь гӏатах йолча йоккхача ишколе лаборатореш, пхьоалленаш, библиотека, спорта, актови залаш я. 250 бер да тахан цу ишколерча классашка дӏачудаьннараш. Шин сменах хиннача дешара хӏама хувцаш хилар из гӏулакх. Юртара пхи ишкол хӏанз цхьан сменах болх беш я. 2020-ча шера дӏаболабаь болх бар из, бакъда цу гӏулакха хьалхалаттараша шоай декхараш лерттӏа кхоачашдеш цахиларах гаьнабаьлар. Массехказа вена хилар цига Мехкада из бахьан долаш», - дийцар «Сердалога» мехкарча Паччахьалкхене.
Ишколага, цун гонахьарча доазонга хьожаш вар Мехкада. Республикан кулгалхочо теркалдир тӏера балхашца, кӏалхарча гӏата тӏа цхьацца кхоачамбоацараш долга. Цу оагӏонцарча балха бехктокхамечарна тӏадиллар цо; деррига гӏалаташ ӏалаьмате чехка, боаггӏача боараме меттадоаладе, аьнна.
Цу моттиге гулбеннача тайп-тайпарча моттигашкарча хьакимашца къамаьл деш, вай Мехкадас хьалхадаьккхар, болх боаггӏача боараме, цхьаккха тайпара гӏалатло йоацаш, тӏехьагӏа хӏама телха хургдоацаш дӏачакхбаккхара лакха тӏахьожам беш, гучадаьнна кхоачамбоацараш гаьна ца доалийташ, меттадоаладеш къахьегаш хила, аьнна.
