Автобусашка нахагара ахча хьаийду гӏулакх картаца дувзар тӏадиллад Мехкадас
Нах дӏа-хьа кхувлача автобусашкара гӏулакх таханарча ханага хьежжа, таьрахьашца дувзаденнарий оагӏонца тоадаь хилийта, аьнна, тӏадиллад республикан Кулгалхочо. Банковски картаца шоашкара доагӏар дӏадала аьттув болаш хила беза нах. Белгалде деза, ахкан тӏехьарча беттагара ардара беттага кхаччалца йолча хана, валидаторашка гӏолла ахча дӏаденнараш ялхазза дукхагӏа болга.
Вай мехкадас Келаматанаькъан Махьмуд-ӏаьлас белгалдарах тарра, 2023-ча шергара денз вай мехка хьачуйоалаяьраш 117 автобус я. Кердача, таханарча ханага хьежжа йолча автобусашка ГЛОНАСС, видеокамераш, картаца ахча дӏадала йиш йола гӏирсаш латт.
Карарча хана валидатораш оттаяьраш 424 автобуса юкъера 148 автобус я. Вай Мехкадас тӏадиллад из болх ма хулла сихагӏа чакхбаккха, аьнна, хӏана аьлча наха атто еш из долга тахан гуш да. Цхьаккха кхоачамбоацар юкъе доацаш болх беш хила еза терминалаш, республикан Кулгалхочо теркалдечох.
Цу оагӏонцарча министерствон декхар да телхараш геттара сиха меттадоаладар, бахархошка картаца ахча дӏадала йиш йолгах хоам беш хилар. Таханарча ханага хьежжа, из болх хьаоттабар наха паргӏато еш да ала деза, хӏаьта эггара керттердар да массахана цу балха тӏахьожам беш, деррига лерттӏа хулийташ хилар.
