Кавказе туризм йоаржаярах, дийцар Максимов Андрейс
«ХӀарма» яхача кхетачен йоккхача сессе, РФ Юкъарча палатан доакъашхо волча Максимов Андрейс дийцар, Кавказе туризм йоаржаярах. Цо белгалдир, юххьанца из гӀулакх хьоадаьча хана, керттердар – мехка туристаш тӀаозар хиннилга. ХӀаьта хӀанз, туристаш хӀара шера дукхагӀа чубаржаш латтарга хьежжа, царна ха яккха, Ӏе моттигаш хилийтар да лоархӀамеча гӀулакхех.
Максимов Андрейс дийцар, хьатӀаухача туристий, кӀалхарча бахархой культура вӀашкаотташ цахиларо гӀулакх кегаде тарлулга. КӀалхарча наьха Ӏадаташ, гӀулакхаш довзаш боаца туристаш харцбала тарлу, хӀаьта из хургдоацаш, хьатӀаухарашта кӀалхарча наьха оамалаш, царна юкъе лораде дезараш довзийташ болх дӀакхахьа беза. Тахан хьаяьнна керда технологеш юкъекхувлаш, тоаде йиш я из гӀулакх, масала, остановкашка хьаеллаш йолча электронни библиотекашка гӀолла йовза йиш я Кавказерча къамий культура, Ӏадаташ.
Иштта Юкъарча палатан доакъашхочо теркалдир, цхьайолча моттигашка туристаш геттара дукха тӀалаттилга, масала, хӀирий, селий мехкашка шахьараш хьалйикъай туристаша; гӀалгӀай, черсий мехкашка из хьал иштта латтац. Къилбаседа Кавказерча моттигашка ухаш бола туристаш цхьайолча республике сов дукха, кхычахьа геттара кӀезига хургбоацаш, болх дӀабахьа безилга теркалдир Максима. ХӀара моттиге туристашцара гӀулакх цхьаттара латтаргдолаш, кердадараш юкъедоаладеш къахьегаро дикка пайда бергболга белгалдир цо.