Наркотикашта духьаларча Шолжа-Шахьарерча комиссе ше баьча балхах дийцар
АргIанара кхетаче дIахьош, наркотикашта духьала къовсам лоаттабеча комиссе 3-ча квартале цу оагIонца ше дIабихьача балхах дийцар гулбеннарашца. «Сердалога» из хоам бир мэре зарбан болх лелабеча Батиганаькъан Хьавас.
«Шахьара да волча Iумаранаькъан Аслана кулгал деш хиннача кхетаче дакъа лоацаш вар «Шолжа-Шахьарера ЦРБ» ГБУЗ лор-нарколог; Илдарха-ГIалий тIарча, Шолжа-Шахьарерча, Шолжа кхален дешара гIулакхех болча оагIон кулгалхой; дийша нах, мэре болхлой. Укх тIехьарча хана, наркомани яха доккха зулам вайна юкъера хоададаь дIадаккха гIерташ, шоаш дIабихьача балхах дийцар кхетачен доакъашхоша, иштта хьоахадир, дешара моттигашка шоаш дIакхухьача кхетаченех», - йоах тхога бенача хоамо.
Iумаранаькъан Аслана белгалдир, цу доккхача, бIехача зулама духьала берригаш ма могга боккха болх дIахьош, къовсам лоаттабеш хила безилга.
