«Духьале йоацаш, кIалгIолла, из унзара базар дIаяхьа аьттув хиларо майра баьхаб зуламхой. Беррига низ тIабахийта, уж гучабоахаргбола, цар къайленаш йовзаргьйола наькъаш леха деза. Наркоманен никъ хоадабе беза!», — аьлар Мехкдас. Таханарча дийнахьа, цу зулама духьала дIахьоча белхах лаьца дийцар, наркотикашта духьале лоаттаеча кхуврча кулгалдеш волча, Геграев Марата. Цо дийцачох, дIадахача шера, цар гучаяьккхай 331 наркотикашца базар лелаю моттигаш. 33% дIалоац геттара доккхача зуламаша. МВД болхлоша дIабихьача тохкамах, 33 моттиг из дохьаж дохкаш лаьцай, 53 кг. наркотик хьаяьккхай зуламхошкара. Мехкдас баркал аьлар, цу зуламаца къовсам лоаттаберашта, цар дIабихьача белхах.

ТIахьийхар, дIахо а, цу зулама наькъаш дехкаргдараш лохаш хила аьнна. Кхетаче гулбеннараша дийцар, тахан наркотикашца базар лелаераша, зуламхошца бувзам лелабе, вIашагIъелла йIаьха тIIирг бахьан, уж гучабаха, хьалувца хало хул аьнна. Зуламхоша керда говзалаш а Iомаяь, дIа-хьа тел из дохьаж. Цунга хьежжа, кIоаргга, бIаьха болх дIахьош чакхдаккха дезаш хул из гIулакх. Мехкдас белгалдир, из зулам дехка беррига Iаьдала болхлой, дийша нах, цу дешах доглазаш бола бахархой юкъе боалабе безалга.

Массане, цхьана, дIабахьа безаш боккха болх ба из! Из зулам леладу аьнна шийна хета моттиг, хIаране, къамах дог лазаш гучайоаккхе, ала дезарашка дIаоале, аттачахьа даргда из хьал. Шоай юхь ехка, из зулам доаржадеш, наьха вахар толхадеш леларашта духьала, арабаккха беза боккха низ, аьнна соцам бир Мехкдас.