Гӏалгӏайчен атлеташ котбаьлар Севастополе дӏайихьача кхетаче
Укх деношка Севастополе дӏахьош йолча Россе Къулбехьен халкъий культуран, спорта фестивале, Гӏалгӏайчен спортсменаша шоаш дикача боараме гойтар. Муш дӏа-юха озарах йолча яхьашка эггара чӏоагӏагӏа низ болаш хилар Магӏалбикера кагий нах. Шоашта духьалъэттар вошал долча Дагестанера тоаба яле а, из я цу яхьашка диазза чемпион, укх наькъа аьттув вайгахьа хилар.
«Магӏалбика атлеташа шахьара Ди дездеш болча Магӏалбика бахархошта тешшаме котало ера, цох доккха совгӏат хилар цӏай дездеча дийнахьа цигарча бахархошта. Цар гойтар лакха говзал, иштта ший 92 шу дузаш хилар дездеш йола хьамсара шахьар езаш шоаш болга. Цу коталоно къаьгга хьагойт, Магӏалбика спортивни ӏадаташ дӏахо дахаш а дегӏадоагӏаш а хилар. Цо безам совбоаккх кагирхой, керда толамаш даха; цар кхетаду къахьегамо, ший низах тешаш хиларо толамга кхоачавелга», - аьлар «Сердало» газетага тоабах дог лазаш бараша.
Магӏалбик йовзаш я мехкдаьттахой шахьар санна, иштта из я къахьегама, тӏема сийлен шахьар. Укхаза ноахалгара ноахалга доалаш, дӏахьош да дикача могашала ӏадат, спорт езаш хилар. Моттигерча спортсменаша каст-каста хьагойт шоай лакха говзал тайп-тайпарча моттигашка, хьамсарча шахьара сий доаккхаш.
