«Цхьан сигален кӏалха» яхача проекте дакъа лаца бех вай мехкара автораш
«Цхьан сигален кӏалха» яхача литературан альманаха шоллагӏча тома юкъе дакъа лаца бех вай мехкара байтанчаш, йоазонхой «Вайнах» яхача Краснодарски лаьттарча Къаман культуран моттиго. Къамий цхьоагӏон Шера хетаяь я из кхоллама проект. Из вӏашагӏйоллаш къахьегараш ба сочински литератораш, «Алетейя» яхача петербургски кепайоазон моттига доакъашхой. Хургдолча книжканна юкъегӏоргда Сочерча, Кубанерча, иштта Россе тайп-тайпарча моттигашкарча авторий балхаш. «Сердалога» из хоам бера мехкарча Миннацера.
«100 мугӏарах латта байташ, иштта проза – дувцараш, эссе, очеркаш - я цу книжканна юкъегӏоргьяраш. Эрсий меттала санна, къаман меттала хила йиш я йоазош, геттара дика хургда эрсий меттала даь таржам тӏадилла уж хуле. Текстаца ший сурт, иштта кхоллама наькъах йола 1000 мугӏарах латта биографи дӏаяхьийта еза доакъашхоша. Тов бетта 30-гӏа ди тӏакхачале, дӏаяхьийта еза уж. Шоай балхаш анкета автораша редактор-оттадер волча Гулямов Фархада 1988898@maӏl.ru электронни адресах дӏадахьийта деза, каьхата тема лакхе «Цхьан сигален кӏалха» оттадаь», - йоах «Сердалога» кхаьчача хоамо.
Кхоллама меттаца доакъашхоша къамаьл де йиш йола оагӏув хургба цу проектах. Тайп-тайпарча культурех, ӏадатех бола йоазонхой, байтанчаш вӏашагӏтохаш, къамашта юкъера бувзам, барт чӏоагӏбеш болх хургба цох. Россе дахача дукхача къамий ӏадаташ, культуран оагӏонцара тӏехьале йовзийташ, ший овла, хьаваьнна моттиг лораяр, йовзар мел лоархӏаме да белгалдеш хургда книжка.
