ГӀалгӀайчен библиотекан болхлоша Ерригроссе конференце дакъа лаьцар
«Библиотекан берригача дезала хургдар: хьаькъал, Ӏадат цхьана» аьнна дӀахьош хиннача Ерригроссе конференце дакъалаьцар ГӀалгӀайчен библиотекаша. «Росси» яхача Халкъашта юкъерча гойтаме яр из. Царна юкъе бар тахан юкъеяьннача республикерча кхаь кхален модельни библиотекай кулгалхой: Иленаькъан Марем, Доврбиканаькъан Диба, ГӀандоранаькъан Аьсет. Царца цхьана дакъа лоацаш яр Янданаькъан Жамалда цӀерагӀча къаман библиотекан кулгалхочун гӀонча, мехка проектни офиса кулгалхо Малсаганаькъан Лида, из бехктокхаме я ГӀалгӀайче модельни библиотекаш хьакхолларах.
«Конференце доакъашхошка моаршал хаьттар Россе культуран министра гӀончас, статс-секретара Преподобная Надеждас. Доклад йийшараша, къамаьл даьраша, федеральни библиотекан кулгалхоша дийцар, вай мехкарча дезалашта юкъерча дешара Ӏадатех, дешара тӀагӀолла уж шоай мохк безаш хиларах, безамерча библиотекан проектах», - аьлар «Сердало» газетага гӀалгӀай къаман библиотеке.
Конференци хетаяь яр Россе библиотекай даькъ тӀарча хаттаршта. Доакъашхоша шоашта хилча бакъахьа хетар дийцар, берашта а иштта боккхийчарна а лаьрхӀа йола библиотека дегӀайоалаяра даькъе. Мероприяти дӀаяхьара лоархӀаме хиннар дар, юкъарча моттиге библиотекаша малагӀа дакъа дӀалоац, дешара, кхетам балара моттиг цар мишта лелаю.
Керттера терко тӀаяхийтар кагирхошта дикагӀа накъабаргболаш болх библиотекаша лелабара, хӀана аьлча уж тахан книжкаш лорадеш а дешара юкъера моттиг дӀалоацаш а я.
