15 эзар совгӏа бола мехкахой тахан духхьаш дакъа лоацаш ба хоржамашка
Тахан кхадж тасса хьаухарашта юкъе къаьстта теркалбу къонабараш. 15 эзар совгӏа бола мехкахой шоай вахаре эггара хьалха кхадж тасса арабаьннаб. Вай кагирхой мехка политически оагӏонцарча вахара хӏама хьаллаца ловш болга хьагойташ да из гӏулакх. Наьсарерча хоржамий моттиге эггара хьалха из декхар кхоачашде хьачубаьннараш къонабараш бар.
Ӏуйран денз шоай болх дӏаболабаь; республикан, мехка вахарца дувзаденна дола хӏамаш лоархӏаме хила дезилга хьаухарашта хьалхадоаккхаш ба хоржама моттигашка тӏахьожараш, иштта тахан эггара хьалха кхадж тоссаш болча вай къонабарашта дала кийчдаь совгӏаташ да царга. Дагалоаттама совгӏаташ луш, цар дог ураоттадеш, из ди цар уйлашка чӏоагӏдеш бар мехка.
Наьсарерча бахархошта лаьрхӏа болх дӏахьораш 22 моттиг я. Комиссе болх чакхбаллалца йолча хана, цига дӏабаха шоай декхар кхоачашде йиш я наьха.
Массайолча моттигашкара болх карарча хана боаггӏача боараме, сабаре дӏабодаш ба. Кхадж тасса венача хӏара сагаца лерхӏам болаш, де дезар хьалхадоаккхаш къахьегаш ба цига.
