Шийна безаш бола вахара никъ харжаб цо. ГӀаьбартой-Балкхарой паччахьалкхен университете юридически дешар дийша ва из, цо доккха дакъа юкъедера республикан спорт дегӀайоалаеча гӀулакха.

2005-шера денз, Абти дика дакъа лоацаш ва юкъарча вахара спортивни даькъ тӀа. Цо кулгалду моттигерча, куран спортивни доакъошта, Россе латара самбох йолча Федерацена, вӀаший качбаха латара Ерригроссийски Федераце доакъошта.

Ше хержача гӀулакхаца дувзаденна Янданаькъан А. тайп-тайпарча балхаш тӀа хиннав:

- 2001-2005 шерашка цо болх баьб ГӏалгӀай Республике гӀолла йолча юстице Министерстве;

- 2005-2012-шерашка - ГӏалгӀай республике гӀолла йолча суда пирстопий Федеральни гӀулакха урхаллене;

- 2013 шера- Пермски крае гӀолла болча суда пирстопий Федеральни гӀулакха урхаллене;

- 2014-2015 шерашка - ГӏалгӀай Республикан Кулгалхочун администраце;

- 2018-2020 шерашка - ГӏалгӀай Республике гӀолла болча суда пирстопий Федеральни урхаллене;

- 2023 шергара таханарча денга кхаччалца – «Магасерча культуран, спорта, туризма ЦӏагӀа».

Ше балха волча ханашка, цо леладаьд дукха бехктокхаме гӀулакхаш, цхьоагӀо йолаш судашкара болх хилийтар, болхлой кийчо къахьегама кийчо дика яр цун тӀахьожам болаш хиннад; иштта герз, герзаца лелабу гӀирс дӀалуча бехктокхаме хиннав.

Янданаькъан Абти хьехамчал деш хиннача ГӏалгӀай Республикан суда пирстопий Федеральни гӀулакха урхаллен тоабо пхе шера вӀаштта (2007-2012) латарах дӀахьоча яхьашка котало яьхар.

2010 шу... Цу хана вай мехка толам цӀихеза бар. Ткъаь шера болх дӀахьош, суда балха бокъонаш лораяра Российски Федераце 85 моттига юкъе дикагӀчарех цаӀ хилар из.

Цу юкъе доккха дакъа дар цигарча спортсмений, хӀана аьлча уж дика кийчо яь хиларах толам баккха таро хилар.

Кхы кӀезигагӀа профессиональни говзал эшанзар Абтена ГӏалгӀайчен шоай доалахьара хӀама хьадерий бокъонаш лораеча а.

Тахан латтача хьалах дийцача, цо дукхагӀа терко лоаттаю спортаца, юкъарлонца, хоамий балхаца бувзам лелабара. Хӏара денна къахьег цо наьха унахцӀена салоӀам вӀаштӀехьабоаккхаш, столица бахархой цунна тӀакхувш хургболаш.

- Спорта уйла еш вар со, зӀамига волаш. Шолажа-Гӏалий тӀа тхо дахача хана, эллиной-румий латар Ӏoмадеш, доккхий толамаш дахарах йола уйлаш цӀаккха а са дагара дӀаялацар. Из дар юххьанца… Цул тӀехьагӀа лаьгӀбелар са цунцара безам.

Сона из фу бахьан долаш хилар а хац, е со мекъа хилар дар е хьехамчас беш хинна хьехам цабезар дар. ДӀахо Нохчашкахьа эттача хьало, кхыча республике со хьалваро, университете дешаш хиларо соцабир са спортацара безам,- дагаух цунна ший цхьайола вахара оагӀонаш.

Мусай Абте къахьегам белгалбаьб доккхийча ГӏалгӀай Республикан Кулгалхочун, ГӀаьбартой-Балкхарой Республикан, Россе юстице Министерствон, Россе ФССП, Россе юкъарча спортивни цхьанкхетарий совгӀаташца.

Из ГӏалгӀайчен спортсмений толамех, ший хьамсара мохк дегӀабоагӀаш хиларах, ший мехкахой вахар тоадаларах дог лазаш ва.