ГӀалгӀай къаман культуранца дувзаденнараш гучадоахаш ба РФ ОП доакъашхой
ГӀалгӀай мехка кхаьча РФ Юкъарча палата доакъашхой къаман культураца дувзаденнараш довзаш хилар. Магасерча «Истинг» яхача кӀувсаш, ферташ хьаеча моттиге бахар уж. Къаман Ӏадатаца чӀоагӀъенна латтача культураца дувзаденнараш юкъера дӀа ца доалийташ, къахьегаш ба тахан цу чура болхлой.
Ферта кӀувсаш де вай къона тӀехье Ӏомаеш, царна из гӀулакх ма дарра довзийташ, дезадолийташ болх бу «Истинг» яхача оагӀоно. ХӀара сага аьттув ба из гӀулакх Ӏомаде. «Аьхинг» яхача фертацара говзал йовзийташ йолча ишколерча кружоке, берашта из болх мишта бе беза довзийташ болча гойтамо Ӏомаю цу оагӀонцара говзал.
КӀувсаш хьадара начӀал къаман юкъера дӀа ца далийтара тӀехьа къахьег цига. Къаьнара тишденна кӀувсаш меттаоттадеш болх дӀакхухь цигарча кхалнаха, иштта гӀалгӀай къаман исторецара тайп-тайпара балхаш довзийташ хургдолча книжканна лаьрхӀа сурташ гулдеш ба цига.
Къаьстта теркаме лоаттаю «Сесарий цӀай» яха, 12 шерал йоккхагӀа йола йиӀигаш кӀувсаш де Ӏомаеш йола проект. Вай къаьнарча Ӏадатаца кхалнах цӀай дӀахьош, яхьаш лелаеш, самукъадоаккхаш хиннача деношца ювзаенна я из цӀи.
«Истинг» яхача кхетаче ухарашта довзаргда къаман Ӏадаташца, тамашийна хетача балхаца дувзаденна культуран оагӀонцара лоархӀамедараш, вай массане лораде дезараш.
