Кагирхой Ди дездеш хилар мохк,
Кагирхой Ди дездеш, йоккха кхетаче дӀайихьар вай мехка. Из хоам «Сердалога» бир цу моттигера. Мужеча уллача спорта кийчо еча моттиге хилар кагирхой цӀай. Цу юкъе дар Магасера Мужеча кхаччалца велосипедаш хахкар, пхьарий гойтам, «Кагирхой маркет» яха гойтам, Эка-ЧӀожарча кхуркхолгага хьажа бахар, тӀема ловзарех йола яхь (лазертаг).
Мехкадас Келаматанаькъан Махьмуд-Ӏаьлас белгалдир, вӀаший бовза, бувзам чӀоагӀбе, цхьацца пайданедараш дӀа-хьа эца гулбеннилга. «Цхьацца хӀаман тӀехьа къахьегаш, дешаш, тайп-тайпарча оагӀонашкара кхоллама болх дӀахьош тоаду сага ший вахар. Беркате наькъаш хьаделлаш дӀадаха деза вай, мотт биц ца болийташ, къаман Ӏадаташ, оамалаш лоархӀаш, Дала воашта хьаденна дин довзаш, Ӏомадеш», - белгалдир вай Мехкадас.
Республикан кулгалхочо доккха баркал аьлар культуран гӀулакхех йолча Министерствон хьалха латтача Лаьнанаькъан Залинайна, кагирхой гӀулакхех йолча Комитета кулгалдеча Малсаганаькъан Адама, иштта цӀай дӀахьош къахьийгарашта.
