Депутаташа даькъалабийцар ишкол яьккха дешархой
24.05.2025 22:53
ГӏалгӀай Республикан Халкъа Гуллама депутаташа дакъа лаьцар лоархӀамеча кхетачене, из хетаяь яр республикан ишколашка тӏеххьара гургал тохаш хилара.
Парламенте, даькъалабийцар хьехархой, шоай болх безаш, цунна мутӀахьа болаш, берашта кхетам луш уж дукхача шерашка къахьегаш хиларах. Цар иштта выпускникашта баркал аьлар, кердача наькъ тӀа толамаш дахара уж тӀахьехаш.
Парламента вице-спикера Хьаьшанаькъан Азас, Наьсарен-Шахьара №1 йолча Гимназе къамаьл деш, белгалдир дешар хургдолчун лард йолга. Цо иштта аьлар, республикан кулгалхоша, къаьстта ГӏалгӀайчен Кулгалхочо Келаматанаькъан Махьмуд-Ӏаьлас терко лоаттаю лакха дикал йола дешар хилийтара.
«Дег чура массанена баркал оал аз, ираз хилда шун!» - аьлар цо.
