Ӏаьлий-Юртаи СурхотӀени юкъера никъ тоабергба
«ГӀалгӀай Республикан машина наькъаш дегӀадар» яхача мехка программанна чудоагӀаш, «Ӏаьлий-Юрт - СурхотӀе» оала никъ тоабара болх дӀаболабаьб. Таханарча денга кхоачаш, цига болх беш боахкараша цхьа километр никъ тӀера шаьрбеш болх дӀабихьаб, хӀанз кӀийле чӀоагӀъеш ба, яхаш, дийцар «Сердало» газетага ГӀалгӀайчен наькъий министерстве.
Беррига а 4,831 км бӀаьха никъ СурхотӀе, Ӏаьлий-Юрт вӀашагӀтохаш ба, 4 эзар совгӀа нах баха юрташ кхален центраца автотранспорта гӀонца ювз цо.
Белгалдаккха дезаш да, цига из никъ тоабарал совгӀа, наькъа йистош а тоаергья, кхыйола моттигаш а нийсъергья, бокъонах йоаггӀача беса.
«Дукхача шерашка из никъ тоабанза хиларах, геттара тишбенна бехабар. Оаха массахана ер тоабеш балхаш дӀадихьадале а, овлангара тоабе беза ха тӀехъяьннаяр. Болх чоалхане ба, бакъда оаха лаьрхӀача хана балхаш йистедоах, тхоашкара дӀаехаш йола дикал а йолаш цу юкъе», - аьлар ГӀалгӀай Республикан машиний наькъий министра Хаматхананаькъан Батыра.
