Россе рекордий кинижка тIа йихьай укх деношка ГIалгIайчен лоамарча лакхача моттиге хинна халкъашта юкъера «MAGAS 2021» яха экологически форум, эггара лакхача моттиге дIайихьа форум хилар из.

Цунна доакъашхой, Россе доазол арахьарча итта мехкара а иштта Россе 25 регионера баьхка а хилар.

Из иштта хилара тешалдеш дола сертификат делар проекта керттерча редактора Коненко Станислава, ГIалгIай Республика кулгалхочунна Калиматанаькъан Махьмуд-Iаьла, форума доакъашхой вIашагIкхетар долча хана.

«Вай вIашагIкхетар дIахьо фордал боарамал лакхагIа 1,2 эзар метр йолча моттиге. Из рекорд, Россе рекордий кинижка тIа белгалъяьй, бакъда, цу тIехьа вай совцаргдац, хьалха кхы а керда рекордаш, кхыдола толамаш да», - аьлар цу вIашагIкхетаре республика хьалхарча вице-премьера декхараш кхоачашдеш волча Iалама ресурсай министра Йовлой Мухьмада. Цо аьлар, кхаьрача дийнахьа форума доакъашхой цхьаькха а толам баккха лерхIаш ба, ЦIей-Лоам кIала 1,5 эзар метр лакхача моттиге эггара йоккхагIа йола пикник ярца.