«Вайнах Наьсар-Керте» футбола ишкол котъяьлар Духин Владислава дагалоаттама яхь дӏахьоча
«Вайнах Наьсар-Керте» яха футбола ишколо хьалхара моттиг яьккхар 25-гӏа Ерригроссийски футбола яхь дӏахьош, из хетаяь яр Россе Турпалхочунна Духин Владиславах болча дагалоаттама, яхаш, дийцар «Сердало» газетага ГӏР футбола Федераце.
«Ставрополе, Тушола бетта 26 денгара 30 денга кхаччалца дӏахьош йола яхьаш, 2013 шерарча спортсмений тоаба дегӏаяра дика таро яр, цар тренер ва Зангенаькъан Тимур. 12 футбола юкъарло кхаь даькъа йийкъаяр. «Вайнах» тоабан доакъашхой тешшаме чубаьлар цу чу. Котало яккхара тӏагӏорташ, цар эшайир ставрополера «Р. Павлюченкой Тӏоарска бургац» (4:1), Ростовера «Мечта» (5:0) иштта хӏирий «Барс» (5:0), шоай тоабан юкъе хьалхара моттиг йоаккхаш. Ах финал дӏахьош, вай кагий нах яхьебаьлар ростоверча СШОР №8 тоабанца. Тӏеххьара ловзар хилар Невинномысскерча «Арнест-Жуниора» духьала, - аьлар газетага бенача хоамо.
Тхоца къамаьл даьчо яхачох, яхьий чаккхе еш, «Вайнах Наьсар-Керте» тоабанна Кубок, майдилгаш, дипломаш делар. Умаевгӏар Мухьаммад дикагӏа вола турнира полузащитник ва, аьнна, хьакхайкавир, хӏаьта Беканаькъан Салихьа дика ловзара говзал гойтарах йола цӏи елар.
