Россе Турпала Тӏумхой Хьасана гаргара нах болча ваха хилар вай Мехкада
Тӏема операцена юкъе, ший декхараш кхоачашдеш вахар хаьдача турпалхочун Тӏумхой Хьасана цӏагӏара нах болча ваха хилар вай мехкада Келаматанаькъан Махьмуд-ӏаьла. Шолжа-Шахьаре дах эпсара да-нана – Руслан, Тамара, цун цӏен-нана Хьава, диъ бер – Амина, Ибрахӏим, Мухьаммад, Исмаӏал.
Хьамсара воӏ дӏаваьнна дог деха кхестача цу наьха оагӏув хьаллоацаш, цар гӏайгӏа яйеш къамаьл дир Мехкадас. «Тӏумхой Хьасан; тӏеххьарча минотага кхаччалца хьалха латташ, денал, майрал гойташ; чакхваьннав. Из гуш да цун тӏема исторех. Шийна тӏехьалаьттараш ший дегӏаца лорабе хьежав из, еррига хало дӏатӏаийца. Деналца, майралца белгалваьнна къаман визза воӏ вар из! Цун даь, наьна, цӏен-наьна оагӏув хьаллоацаш, уллув хила хьожаргда тхо массахана. Турпалхочун берий, цар массане хьашташ кхоачашдеш, малагӏа тайпа новкъостал эш хьожаш латтаргда. Моллагӏа гӏо царна ийшача, цар оагӏув хьаллаца массахана кийча хургда», - дийцар тхога мехкадаь зарбан болх лелабераша, республикан кулгалхочо даь къамаьл довзийташ.
Турпалхочун цӏагӏарча нахаца къамаьл деш, царна малагӏа гӏо эш техкар Мехкадас. Тӏумхой Хьасан тӏема опрецена юкъера вай мехкара пхелагӏа бӏухо ва Россе Турпала цӏи енна. Тӏема декхараш токхаш латта атта дац, хӏаьта вай къаман къонгаш деналца, майралца цӏихеза болаш, хьабоагӏа тӏема аренашка. Турпалий цӏераш йовза еза вай къонача тӏехьеннна, исторе лоархӏаме моттиг дӏалаьца нах ба уж.
