Сийлахь-боккхача Даьймехка тӏема Коталон юкъе, гӏалгӏаша дакъа лацарах дийцар вай Мехкадас
Сийлахь-боккхача Даьймехка тӏема юкъе вайга котало кхаьча 85 шу дизад. Вай къаман наха коталон ди гаргадоаладара юкъе малагӏа дакъа лаьцад дийцар мехкадас Келаматанаькъан Махьмуд-Ӏаьлас.
«1941-ча шера аьтинга бетта 22-гӏа ди дерригача советски адама боккха бала бахьаш дера. Сийлахь-боккха Даьймехка тӏом болабелар цу дийнахьа, бӏаьшерашка цу ден човнаш йицлургйоацаш, даха дисар из мехка исторе. Тӏемо дохадир наьха тоаденна лаьтта вахар, миллионаш адамий вахар хоададир; шахьараш, юрташ йохайир; нах ӏазапе оттабеш, шоай мел долча хӏамах баьхар. Цу тӏемо хьагойтар, советски адам цхьа барт болаш, моастагӏчоа лира тохаш, цо лаьрхӏа хиннар чакх ца доалийташ, вай лаьтташкара эккхавеш, духьала мишта эттар», - йоах тхогарча хоамо.
Вай мехкадас Келаматанаькъан Махьмуд-Ӏаьлас белгалдечох тарра, фашист вохаве аьнна вай мехкара тӏем тӏа бахараш 20 эзар совгӏа нах ба, 6 эзар гаргга бола бӏухой цӏенах кхийттабац, тӏема аренашка лийгаб уж, фашиста лар хоадаеш. Цох лаьца тӏема исторе кӏезига яздаьдац. Вай дегашта цӏаккха а бицлургбоаца, кхоане сийрда, машаре хилийта гӏерташ, бӏехача моастагӏчоа духьаллаьтта нах ба уж.
Мехкадас теркалдир, котало кхачара юкъе Магӏалбике этта хинна тӏом къаьстта йоккха моттиг дӏалоацаш хиннилга. «Тӏема сийлен шахьар» яха цӏи елар Магӏалбика из бахьан долаш, цул совгӏа Магӏалбика кхален бархӏ юрта «Тӏема духьале еш белгалъяьнна моттиг» яха цӏи елар. Майралца, деналца фашист вохавеш духьалъэттар цу юрташкара нах.
«Гӏалгӏай къаман яхь йола къонгаш, мехкарий арабийннаб фашист ше лаьрхӏачох дехкеваккха. Брестски крепосте, Москве, Сталинграде, Ленинграде лаьттача тӏемашта юкъе хиннаб гӏалгӏай, Берлине чубаьнна рейхстаг хьайоаккхарашта юкъе хиннаб. Тӏема исторе массахана яхаргья деналах, майралах бизза хиннача цу наьха цӏераш. Дала къахетам болба царех, Дала гешт долда царна, бийрза моттиг Дала даькъалайойла цар!» - аьлар Мехкадас.
