«Хьалхарчар болам» яхача оагӀонца кхетаче дӀайихьар вай Мехкадас
2025-ча шера дӀабахьа безача балхах дувцаш, кхетаче дӀайихьар вай мехкадас Келаматанаькъан Махьмуд-Ӏаьлас, «Хьалхарчар болам» яхача оагӀон доакъашхошца.
Вай республике дикка даржаш латт «Хьалхарчар болам» яхача оагӀон гӀулакх. Ийс моттигера 215 юххьанцара тоабаш я тахан. 35 эзар совгӀа саг чувоагӀача царна юкъе 29 эзар дешархо, 800 студенташ ва. Тайп-тайпара кхетаченаш дӀакхухьаш, наха гӀо деш хьабоагӀа уж. 29 эзар совгӀа бер да цу юкъе, укх шера 70 эзарнега кхоачаш доаржаде лерхӀ из гӀулакх.
ДӀаяхьа езача кхетаченашта юкъе ба «ДагадоагӀа. Доаккхал ду!» яха 2000 совгӀа кагирхоша дакъа лоацаргдола болам, иштта Сийлен Мемориале дӀаяхьа еза кхетаче я цу юкъе, лоархӀаме моттиг дӀалоацаш да «Зарница 2.0» яха Ерригача Россе тӀемах ловзар, 14 эзар совгӀа сага дакъа лоацаргда цига.
«Из гӀулакх вай мехка лоархӀаме да, тахан кхувш латтараш Даьхе еза, лархӀа, боккхагӀбарий сий де Ӏомабу цу юкъе. Вай истори, культура, тхьовра денз хьаяхьа оамалаш эздий, тахан доаккхал де дезаш я. Из деррига лорадеш, хам беш дӀадаха деза вай дӀахо», - белгалдир вай Мехкадас цу кхетаче.
