Берий дехараш кхоачашдеш бола болам хьаллоацаш, совгӀаташ дир Мехкадас
Боккхача боламе дакъа лоацаш, берий дехараш кхоачашде эттар вай мехкада Келаматанаькъан Махьмуд-Ӏаьла. МагӀалбикерча Раянайга дӀакхаьчар дукха сатийса сурташдоахорг, ТӀой-Юртара Юсуф аккумулятор латта машен хехка йиш йолаш ва хӀанз, Хьавайга дӀакхаьчар цо йийха телефон. Берий дегашта доккха цӀай дар, шоаш хьийга совгӀаташ хьакхачар. «Сердало» газетага из хоам бир Мехкадаь зарбан болх лелабераша.
«Керда шу хьатӀадоагӀача хана, совгӀаташка сатувсаш хул бераш, хӀаьта тахан вай кара да цар дегаш хьастар», - аьлар республикан кулгалхочо.
ХӀара шера из болам хьаллоацаш хьавоагӀача Мехкадас белгалдир, иштта шоаш теркалбар берий дегашта вӀалла диц ца лулга. Вай мехка дахаш дола бераш теркалдеш санна, Токмакски кхалерча берий дехараш кхоачашдеш совгӀаташ къоастадир республикан кулгалхочо.
