РФ гӀишлошъяра, ЖКХ балхах волча министраца кхетаче хилар вай Мехкадаь
РФ гӀишлошъяра, ЖКХ балхех йолча Министерствон хьалха латтача Файзуллин Ирекаца Москве кхетаче дӀайихьар вай Мехкадас Келаматанаькъан Махьмуд-Ӏаьлас.
Из хоам бу гӀишлон балхех болча федеральни оагӀоно. Кхетаче дийцар федеральни проекташ, наьха вахара хьалаш тоадеш йола къаман проекташ йоаржаеш дӀахьоча балхах, иштта шахьарера моттигаш тоаярах йолча проектага гӀолла чакхбаьккхача балхах хьоахадир.
Республикерча толамех дийцар вай Мехкадас: 2024-ча шера гӀишлошъяра балхаш дика чакхдаьннад мехка, 171, 7 эзар кв. метрага кхоачаш гӀишлош я хьалъяьраш. ХӀаьта цу шерарча Ӏан шоллагӀча бетта 27,1 эзар кв. метр чулоацаш дӀабихьаб из болх. Карарча хана республике хьалдеш латт 34,8 эзар кв. метрага кхоачаш дола ялх вӀаштӀара даь цӀа.
2019-ча шера денз 6,7 эзар кв. метрага кхоачача, харцар кхерам болча цӀеношкара нах кердача фусамашка дӀачубахийтаб, вахара хьал тоадеш йолча къаман проектага гӀолла кердача цӀеношка дӀачуухаш латт бахархой тахан. Иштта кхетаче дийцар шахьара моттигаш тоаярах йола федеральни проект йоаржаярах.
Белгалдир, дӀадахача шера республике 20 доазув тоадеш болх чакхбаьккхалга. Келаматанаькъан Махьмуд-Ӏаьлас, Файзуллин Ирека хьоахадир республике йоккха дарбанче, музея лаьрхӀа керда гӀишло хьалъярах.
