Цунах дийцар цо, республика столице ше йоккха кхетаче дӀахьоча хана, аьлар «Сердало» газетага республикан кулгалхочун зарбан болх лелабераша.

Бахача наха гӀулакх дара, благотворительни акцеш дӀаяхьара наькъ тӀа дукха дика гӀулакхаш карагӀдаьннад Паччахьалкхен Дума депутаташта, ГӀалгӀайчера викалаш болча РФ сенаторашта, аьлар цо.

«Дукха хаттараш кхоачашдара сона новкъостал деш ба Паччахьалкхен Дума депутаташ, сенатораш: Хамченаькъан Билан, БӀархой Мухарбик, БӀарахой Бек-хан, Татренаькъан Муслим. Республикан хьашташ кхоачашдара, федеральни бокъонах уж хилийтара, дукха декхараш дӀатӀаэц цар. Из доацаш а дика дакъа лоац тайп-тайпара бахархошта новкъостал дара йола акцеш дӀахьош, дешара, унахцӀенонна даькъ тӀа, балха оттара декхар кхоачашдеча, лаьрххӀача операце дакъалацара хьакъехьа нах хьаллоацача», — аьлар ГӀалгӀай Республика Кулгалхочо.

Иштта Махьмуд-Ӏаьлас белгалдир «САФМАР» яхача промышленни тоабан кулгалхочо Гуцаранаькъан Микаила дер доккха новкъостал да, аьнна. Цо, ший хьамсарча республика доазон тӀа дукха хувцамаш даьд, йоккхий социальни проекташ кхоачаш а яьй.

«Вайна довзаш да цу сага карагӀдоалар. Из ше деча дикача гӀулакхашца белгалваьннав Белоруссе, кхыча мехкашка. Вай баркал оалаш хила деза Гуцаранаькъан Микаила, цо, шийх тайп-тайпара доацаш дола къамаьлаш дувцарашка ла а ца дувгӀаш, республиканна новкъостал деш хиларах», — аьлар Келматанаькъан Махьмуд-Ӏаьлас.

Белгалдаккха безам ба са, лоаццача хана ГӀалгӀайче дика говзал йола болхлой вӀашагӀкхийтта хилар, уж ба экономика, социальни даькъ тӀа шоай болх дика кхетабеш бола нах. Уж вай республикан кхоане дегӀайоалаяра, хьалхашка латта декхараш лерттӀа кхоачашдара дола тешал да.