ХьунагӀарча оакхарий гӀулакхага хьожаш ба, хьун тӀахьожам лоаттабераш
Хьун тӀахьожам лоаттабеш бола къахьегамхой, вай хьунашкарча оакхарий гӀулакхага хьожаш ба. Хан-ханнахьа оакхарашта ялат, хий, тух увттадеш болх дӀакхухь цар.
Наьсарерча хьун тӀахьожам лоаттабеча оагӀонна кулгал деш волча ЦӀечой Хьасана хьунагӀа лелача акха котамашта лаьрххӀа хьажкӀий гали, кхыдолча, вӀашагӀаэдаьча ялатий гали дера. Хьасана яхачох, зӀамига кхерилгаш юкъе дола даар хоза хет царна.
«Хьалха денз укхаза яхаш йола акха котамаш яц аз ювцараш, дукха ха йоацаш хьаена, хьунагӀа дӀахийцараш я. Айса цхьанне хьадена ялат доаржадир аз царна. Атта-м дацар цхьаь галеш текхаде, деце а, оалхазарашта шортта кхача хургба.
Айса ялат доаржадаьча шин моттиге суртдоахаргаш увттайир аз. Дог гӀозадоаккхача видеога хьежаргда-кх вай цхьана», - дувц Хьасана.
