Тӏема аренашка лелача вай бӏухошта, хӏамаш яхьийтар ИнгГУ
Тӏема аренашка латтача вай бӏухой оагӏув хьаллоацаш, царна эшар, дезар фуд тохкаш ба мехка. Цу гӏулакха юкъе дакъа лаца ловш хилар мехкарча паччахьалкхен университета болхлой, студенташ. Ерригача Россе боаржабаь бола «Деррига а Котало бахьан!» яха болам хьаллоацаш, Къаман фронта оагӏонга бӏухошта эшаш йола хӏамаш дӏаелар университета. Белгалде деза, еррига хӏамаш тӏема аренашка леларашца бувзаме болаш, царна эггара чӏоагӏагӏа эшар фуд техка вӏашагӏтеха йолга.
«Сердалога» мехкарча Къаман фронтера бенача хоамах, бӏухошта хӏара дийнахьа эшаш йола, технически оагӏонцара, тӏема аренашка моастагӏаша зувргбоацаш еза хӏамаш я цу юкъе. Кхача кийчбе, бӏохабала эшаш йола ялх пешк-буржуйка, 4 бензинацара генератор, дахча теда 6 бензинацара херхаш, тӏема аренашка зувргбоацаш эша 22 цхарал, хий цӏенду 45 фильтр, сангарашка боагабу 280 кӏерам, иштта кхыйола хӏамаш я бӏухошта кийчъяьраш.
Университета хьехархой, студентий къахьегамца, дог лазаш хиларца гулъяь я еррига хӏамаш. Укх деношка ӏохьоргья уж тӏема аренашка латтача вай бӏухошта.
Белгалде деза, иштта оагӏув хьаллацар, дезар фуд тохкаш хилар мах баь варгвоацаш доккха долга. Цӏагӏа шоаш дагабоахкаш, шоаех дог лазаш, гӏо де кийча болга ховш хила беза хала денош токхаш латта бӏухой. Массахана царна терко еш, бувзаме долаш хила деза вай.
