ГӀалгӀай паччахьалкхен 100 шу дизар дезде кийчлуш ба мехка
Укх бетта 28-ча дийнахьа Шолжа-Шахьарерча Дьякова цӀерах йолча стадиона тӀа ГӀалгӀай Паччахьалкхен 100 шу дизар дездеш хургья республика. Кийчон болх дӀахьош ба цига тахан.
«Къаман дӀаьхий дола истори, культура йовзийташ боккха болх ба цига дӀахьоргбар. ГӀалгӀай паччахьалкхе хьаоттар, укх 100 шера цо хьабена атта боаца никъ, карагӀ мел даьннар гойтаргда цига», - дийцар «Сердало» газетага культуран гӀулакхех йолча Министерстве.
Мел дукха халонех чакхдаьннадале а, ший Ӏадаташ, культура, мотт лорабеш, сий деш хьаденад гӀалгӀай къам. Таханарча дийнахьа майрра гӀа боаккхаш, хӀара денна ший моттиг тоаеш, Россе паччахьалкхе чӀоагӀъяра тӀехьа лоархӀаме дакъа лоацаш хьайоагӀа ГӀалгӀайче.
ГӀалгӀай паччахьалкхен 100 шу дизар ший истори, культура лоархӀаш мел барий доккха цӀай да. Эггара хьалхарча оагӀонца хам бе беза вай ер таханара ди воашка кхачийта гӀерташ, шоашта мел могар деш, низ Ӏобиллача даьй.
