Республика кийчлуш я «Россе кхалсага дог» яхача Ерригроссийски Фестивале дакъа лаца
Гӏалгӏайчен викалаш гӏоргба Аьдагӏий мехка «Россе кхалнаьха дог» яхача Ерригроссийски кхоллама фестивале дакъа лаца. Кхетаче дӏахьоргья Майкопе, ардара бетта 12-ча денгара 14-ча денга кхаччалца. Цига дакъа лоацаш хургба Россе Къулбехьен, Даькъастен республикай, иштта Донецки, Лугански Халкъа Республикай лаьрххӏача тӏема операце доакъашхой дезал.
«Фестиваль вӏашагӏъеллай «Даьхен лорабой» Паччахьалкхен ганза, из хетаяь я Россе къамий цхьоагӏон Шу хилара. Цун керттера декхар да бейнача, мичаб ца ховча, хӏанз тӏема мугӏарашка латтача бӏухой фусам-ноаной, дезал вIашагӏтохар. Гӏалгӏайчера цига гӏоргья СВО веннача бӏухочун йоӏ Налганаькъан Рианна, берий хореографически «Сийг» яха ансамбль, керте Имагожанаькъан Мухьмад волаш, иштта халкъа кхоллама кулгалхо Имагожанаькъан Медина. Доакъашхошта юкъе да СВО бейнача бӏухой бераш. Цар гойтаргья цу фестивале гӏалгӏай къаман культура. 10 шу даьннача Рианнас кийчъяьй СВО турпалхошта хетаяь байташ, хӏаьта «Сийг» ансамбло - ашарий-халхара оагӏув», - аьлар «Сердало» газетага «Даьхен лорабой» ганза филиале.
Хӏанз уж наькъа баха тӏеххьара кийчо еш ба. Наьсарерча гӏалгӏай къаман дагалоаттама сийлен Мемориала даькъ тӏа цар дӏаязйир видео.
