Запорожски областанна юха а гуманитарни новкъостал дахьийтар вай мехкахоша
17.10.2023 14:10
АргӀанара гуманитарни новкъостал дахьийтар ГӀалгӀайчера, Запорожски областа Токмакски кхален Молочанск яхача шахьаре. Укх наькъа цига яхьийтар 78 цӀерах латта гӀишлон материалаш: гӀайбаш, ардакх, кирпишк, цемат, толь, минеральни боамби, турбаш, цӀен чура наӀараш, кхы а дукха хӀамаш. ГӀишлон материалаш вӀаштӀехьа яьхар, ГӀалгӀайче дегӀакхувлача къаман фондерча ахчах.
Кастлуш шелал оттаргья, бакъда Молочанскера нах е чубаха фусам йоацаш бисаб, е фусам тоае езаш ба. Шахьара администрацена таханарча дийнахьа из эггара лоархӀамегӀа дола дош да. Цудухьа оаха тхоай оагӀорахьара новкъостал де лаьрхӀад гӀишлон материалашца. Наха чӀоагӀа хала да чубаха фусам йоацаш, дукхагӀбараш шоашца къабенна нах болаш ба. Царна чӀоагӀа эш цӀен кхуврч, йӀовхал, цудухьа царна долча новкъостала вай оарцагӀдаьннад»,-аьлар ГӀалгӀай Республикан Кулгалхочо Келаматанаькъан Махьмуд-Ӏаьлас.
ГӀалгӀайче дӀахо а Токмакски кхален новкъостал де лаьрхӀа я. Белгалдоаккх, Запорожски областаи ГӀалгӀайчени юкъе баь барт ба, карарча шера Петербурге халкъашта юкъера экономически кхетаче дӀахьоча хана, шоайла гӀулакхаш леладергда, гӀо-новкъостал дергда, аьнна. Халача хана эшачунна новкъостал дар, цунна оарцагӀвалар - массаза а хиннай гӀалгӀай къаман керттерча оамалех цаӀ. Халача хьалашка биса Токмакски кхален бахархой цун хам беш ба аьнна хет сона.
ГӀалгӀайчера дукхаза ишколе эшаш бола гӀирс бахьийтаб, иштта гӀишлон материалаш, даараш дахьийтад цига.
