ГӀалгӀай профсоюзаш хьакхелла 100 шу далар белгалдир
Магасе дӀайихьар йоккха кхетаче. Из хетаяь яр гӀалгӀай хьалхарча профсоюзий болх дӀаболабара 100 шу дизара, иштта «ГӀалгӀай Республикан профсоюзий организацей цхьанкхетар» яха Союз хьакхелла 20- шу далара. Из хоам «Сердало» газетага бир цу моттигера.
Магас-Шахьара культуран дегӀаахара Центре лоархӀаме кхетаче дӀахьош дакъа лоацаш хилар ГӀалгӀайчен Профобъединене кулгалхо Жандиганаькъан Аланбик, ГӀалгӀай Республикан Кулгалхочун, Паччахьалкхен администраце кулгалхо Мархенаькъан Анзор, ГӀалгӀай Республикан Юкъарча палатан кулгалхо Ӏамарханаькъан Лейла, иштта кхы дуккхабараш.
Цунца дувзаденна, мехка профсоюзий болама хьинар дарашта «ГӀалгӀай Республикан паччахьалкхен 100 шу дизара» юбилейни майдилг елар.
Даькъалабувцаш телеграммаш ера Нохчий, Къарший-Черсий, Къилбаседа ХӀирий, Ставропольски края профсоюзий кулгалхошкара.
«Аз дег чура даькъалабувц беррига хьаьший. Таханара ди - из вайна юха а хьежа, цу ханара ГӀалгӀайчен профсоюзаша бӀаь шера хьабена болх дагабоха бахьан да. Наха лостам, цхьоагӀо йолаш, шоайла эшача новкъостал дара кийча болаш, хьабенача балха толама бӀаьха никъ ба из.
Из истори дагаухаш, вайна гу, кӀезиг-кӀезига гӀа боаккхаш, профсоюзаш юкъарлонна тешаме оагӀув хинна дӀаоттар. Из дӀадаха бӀаь шу санна, кхы а лакхагӀча толамашца дукхача бӀаьшерашта накъаяха таро хийла, берригача мехка а вай республикан а профсоюзий. Даькъала хилда шо цу цӀайца!» - аьлар ГӀалгӀай Республикан «Профсоюзий цхьанкхетара» кулгалхочо.
