ГӏалгӀай мехка дездир кхоъ къаманна лоархӀаме цIай
Магасерча «Алания» майдан тӀа дездир вай къаман вахаре лоархӀаме кхоъ ди: ГӏалгӀай паччахьалкхен Ди, ГӏалгӀайче Россех дӀакхийтта Ди, ГӏалгӀай Республика хьакхелла Ди. ЛоархӀаме кхетаче дӀахьоча баьхка хилар вахара массадолча даькъ тӀара болхлой, викалаш, цо белгалдоаккх мехка тайп-тайпара къамаш шоайла барт болаш дахаш хилар, яхаш, дийцар «Сердало» газетага цу моттиге.
Массаза санна Российски Федераце, ГӏалгӀай Республикан паччахьалкхен гимнашца хьайийллар кхетаче. Цул тӀехьагӀа гулбеннарашка моаршал хоатташ, ГӏалгӀай Республикан Кулгалхочо Келаматанаькъан Махьмуд-Ӏаьлас къамаьл дир.
Цо яхачох, таханара цӀайш вайна хьалхадоахаш да, ГӏалгӀайчен дӀадахача вахара оагӀон тӀа, бекхтокхаме а болаш, мохк лорабеш дукхача ноахалех нах лаьтта хилар, уж цӀаккха а юхабаьнна хиннабац, хьалхашка нийсъеннача халонех кхерабенна.
«Ше къамаьл деш, Президента Путин Владимира ма аллара, ГӏалгӀайче йоккхача российски паччахьалкхен цхьа дакъа хинна дӀаэттай. Мел нийсденнад вай вахаре цатоамаш, бакъда вай хьалаьцача наькъ тӀара юхадийрзадац. Вай доаккхалца накъагӀоргда цу денна, из дага а лоаттадергда, хӏана аьлча хӀанз хала ханаш я вай мехка. Из денал хӀанз а долаш да, из гуш хул вай бӀухоша, сий ца доадеш, Даьхенна хьалхашкара шоай декхар кхоачашдеча хана», - аьлар Махьмуд-Ӏаьлас.
Цул совгӀа, мехка Кулгалхочо майдилгаш елар «Российски Федераце доазонаш чӀоагӀдеча дика дакъа юкъедахьарах» Российски Федераце Федеральни гуллама Паччахьалкхен Думан депутата Татренаькъан Муслима, ГӏалгӀай Республикан Паччахьалкхен кулгалхочун хьалхарча заместитела Йовлой Мухьмада, ГӏалгӀайчен юртбоахама министра Гаьгенаькъан Мухьмада, ГӏалгӀай Республикан Юкъарлон палата аппарата кулгалхочоа Гарчхананаькъан Анзора.
Концерта программа чудоагӀаш, сцена тӀа ваьлар Нохчий Республикан халкъа артист ДимаевгIар Ӏаьла - «МагӀалбик», Ломинский Александр - «Лочкъадаь ираз», КБР халкъа артист Ураган Султан - «Зӏамига лоамаро». Шварцман Борис - симфонически оркестраца цо аьлар «ГӀарагӀураш» яха илли, иштта кхы дуккхабараш.
Хоза, безаме дӀайихьар Ӏадатий оагӀонаш; царна юкъе яр исбахьален кулгаговзал, иштта «Говзанчий мохк» яха халкъа карагӀдоалараш гойташ йола моттиг.
Гойтам а говзанч-хьехамаш а дӀадихьар ГуржегӀара, Селий мехкара, Ставропольски краера, ДНР, Астрахански областера, Волгоградски областера баьхкача говзанчаша.
