Дешара Ди дездеш ба мехка
Дешара шу дӏадоладалара хетаяь кхетаченаш дӏахьош ба тахан мехкарча ишколашка. Укх шера дешара моттигашка ӏохайнараш 85 эзар дешархо ва, царна юкъера 8,5 эзар бераш хьалхарча классе долхаш да. Мехкарча тайп-тайпарча моттигашкара кулгалхой хилар; берашца, хьехархошца, берий даьшца, ноаношца из цӏай дездеш. Цӏайна хетаяьча кхетаченашка дакъа лоацаш хилар вай мехкада Келаматанаькъан Махьмуд-Ӏаьла, Паччахьалкхен кулгалхо Сластенин Владимир, вице-премьераш, министерствай кулгалхой, иштта Халкъа Гуллама депутаташ.
Къаьстта терко еш хилар гулбеннараш ишкола доазон тӏа тахан хьалхара гӏа баьккхача берашта, иштта укх дешара шера, ишколаца ӏадика йийца, боккхача, лоархӏамеча наькъ тӏа къахьега болабала безарашта. «Сердалога» из хоам бера мехкарча Паччахьалкхера.
Мехка кулгалхоша шоай къамаьла юкъе теркалдир, дешара хьал ма хулла тоадар, ши смена дӏаяккхар тахан керттерча декхарех долга. Гӏоза, беркате хилда шоана ер дешара шу! Дика дешаш, шоашта хьалхадоаккхар дӏаэцаш бола дешархой дукхагӏа хилба массаболча хьехархой!
Кхетаче чакхъяьнна хьалхара гургал техача шо-шоай моттигаш хьалаьца ӏохайшар, кхоана къаман хӏама тоаде ураотта беза дешархой.
