Наьсарен-Шахьара культуран цӀагӀа хилар, Россе денна хетадаь концерт. Из паччахьалкхен цӀайшта юкъе лоархӀамечарех цаӀ да, ГӀалгӀайчен бахархой массаза хоза накъаболх цунна.

ЦӀай дӀахьош дакъа лоацаш бар ГӀалгӀай Республикан Кулгалхочун администраце викалаш, Паччахьалкхе, мехка министерстваш, боахамаш, шахьара администраце кулгалхой, цунна чубоагӀа кхыбола викалаш, урхаллений болхлой, республикан бахархой.

Моаршал хоатташ, дош аьлар ГӀалгӀай Республикан Кулгалхочун декхараш кхоачашдеш волча Сластенин Владимира, ГӀалгӀай Республикан Халкъа Гуллама кулгалхочо ТӀумхой Мухьмада.

Шоай иллешца, ашарашца цу дийнахьа гулбеннарий дог гӀоздаьккхар ГӀажарий-Юртарча культуран цӀен «ГӀазкхийи гӀалгӀайи» яхача гӀазкхий хоро, «Дега оаз» яхача рок-тоабо, иштта кхыча кхоллама тоабаша.

Цул совгӀа, цу кхетаче Георгиевски жӀарга бустамаш делар, Кавказа моттигерча бахархой говрий бӀунца, ГӀалгӀай дошлой полкаца хиннарий тӀехьенашта.

Иштта, «Тхо Россе дахархой да» яхача болама чудоагӀаш, РФ бахархой хилара тешал (удостоверение) делар республикан зӀамигача бахархошта. Боккхача вахара наькъ тӀа боалача кагирхошта а, Сластенин Владимира ше паспорташ дӀаделар.

ЦӀай, концерт дицлургдоацаш сийрда, безаме дар, цар цӀаькха а белгалдир ГӀалгӀайчен барт-цхьоагӀо хилар.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде