«Хайра вахалва!» яха комеди гойта кийчлуш ба кагирхой театра актёраш
Керда спектакль гойтаргья мехкахошта кагирхой театра актёраша. Шено Пьер яхача французски драматурга язъяьча пьесах «Хайра вахалва!» яха комеди кийчъяьй цар тахан. ХХ -ча бӏаьшерен 30-ча шерашка Франце хинна хӏамаш да комеде гойтараш. Къаьнарча Европан моттигашка кхоачаргба хьажархой. Массане дог ураоттадеш комеди я кийчъяьр.
«Комеди оттаеш къахьийгар ва лакха начӏал дола режиссёр Лаьнанаькъан Ахьмад, хӏаьта цу балха таржам деш хиннар къаман артист Зангенаькъан Руслан ва. Спектакла юкъе ба вайна массанена дика бовзаш бола Бузуртанаькъан Адам, Куштанаькъан Руслан, Курскенаькъан Римма, Кокурхой Зульфия, Долакханаькъан Мухажар, Ганенаькъан Хьава», - дийцар «Сердалога» кагирхой театре.
Французски беламе драматурги йовза, Лаьнанаькъан Ахьмада цу балхаца мел говза къахьийгад гургда вайна дукха ца говш, хӏаьта кагирхой театра актёраш-м хьажархошта дукха хана денз безабенна ба.
