Кагирхой театро гойтар «Хьамсара нус» яха спектакль
СалоӀача деношка, культурах бола шоай кхетам лакхбеш хьабоагӀа ГӀалгӀайчен бахархой. Укх деношка Наьсарерча культуран цӀен зал хьалйизаяр, «Хьамсара нус» яхача спектаклага хьажа баьхкача наха. Из оттаяьяр къаман кагирхой театро, яхаш, хоам бу цигара.
Маьр-наннеи керда енача несийнеи юкъерча беламерча гӀулакхаша, тайп-тайпара уйлаш сомаяьхар хьажа баьхкарий дегашка. Царна дайра несийнеи маьр-наннеи юкъе нийслуш дола цатоамаш, безаман къайленаш, говзалца дӀа-юха Ӏехабар, кхыдараш. Юххера а, барт хул царна юкъе, ший воӀа езаш йоалаяь нус тӀаэц маьр-нанас а.
Блгалдаккха деза, цунга хьажа баьхкача наха юкъе кхыча къамий викалаш хиннилга; цар а, хоза хеташ, тӀаийцар сцена тӀа гуш дар. Бийцар гӀалгӀай мотт бале а, маӀан кхетадарах салоӀам хилар хьаьшашта.
