ГӀалгӀайчен кагирхой театр овлангара тоаде лаьрхӀад
Карарча шер ГӀалгӀай паччахьалкхен кагирхой театр тоаде доладергда, цох бокъонца йола республикан кагирхой культуран центр хургья. Цу гӀулакха 200 млн сом хьожадаьд.
Таханарча дийнахьа из театр воча хьале да: цига яц лерттӀа сцена, хьажархой зал, дӀахо болх бе йиш йий-хьогӀ яха хаттар а отт цига. ХьалхагӀа, ГӀалгӀайчен Кулгалхо Келаматанаькъан Махьмуд-Ӏаьла ваха хилар цига, цо белгалдаьдар цига овлангара хувцамаш де дезаш хилар.
Цу тайпара цӀенхашта тоадаро керда таронаш хьаелларгья культуран болх дӀабахьара.
«Тхона лов укхаза дика спектаклаш дӀаяхьа, вай бахархой цига дукха ухаш хилар. Тоадаь даьнначул тӀехьагӀа из хургья берригача республикан кагирхошта йола культуран центр, цо кхебергба, дегӀабоалабергба керда начӀал дола нах»,-аьлар мехка кулгалхочо.
Из тоадаь дала мегаш да 2027 шера. Болх дӀахьоргба «Культура дегӀайоалаяра» паччахьалкхен программах, иштта «Дезалера мах бараш, культуран хьалаш» яхача федеральни проекта, «Дезал» яхача къаман проекта чубоагӀаш.
