ИТ-Академе ший хьалхара балха шу дезду
Магасерча таьрахьий дегӀаахара академе ший балха хьалхара шу далар дездир, цох хилар ИТ-даькъ тӀа говзанчаш кийчбара лоархӀамегӀа йола центр.
ГӀалгӀайчен кулгалхочо Келаматанаькъан Махьмуд-Ӏаьлас белгалдир, мехка керттера дешара таро хинна Академи дӀаоттар.
Доалахьара хӀама хьадеш волча Гуцаранаькъан Микаила «САФМАР» тоабо вӀашагӀъеллача проекта, цхьан шера 12 эзар совгӀа дехараш чуделар тайп-тайпарча программашта. 500 совгӀа саг чакхваьлар Академе курсашка дийша, хӀаьта 1 000 доакъашхо хьакхийтар «Ишкола 21» Сбера проектах, царех 300 волавелар таханарча ханара программироване болх бе.
Цул совгӀа, Академена чуйоагӀаш йолча «ГӀалгӀайчен бизнес-акселераторо» Ӏомавир 500 совгӀа саг, цу юкъе шоай доалахье лелаераш а болаш, цар а дика дегӀайоалаю шоай компанеш.
«Тахан таьрахьий даькъ тӀа дукха таронаш хьаелл вай кагирхошта. Цига дийша хиларах цар таро я, шоаш гаьна а болаш, моллагӀа российски компанешка болх беш хила, ГӀалгӀайче бахаш бар аьнна из Ӏаткъаш а доацаш цар балха. Цо таро лу республикан балха даькъ тӀара таронаш чӀоагӀъяр меттел, мехка экономически хьал а дегӀадоаладе», - аьлар Келаматанаькъан Махьмуд-Ӏаьлас.
Гуцаранаькъан Микаила ший аргӀагӀа лоархӀ, дика дешар, из дика вахара таронаш хьакхолла оагӀув я, цудухьа ГӀалгӀайче иштта дешара моттиг хьакхолларах из вӀаштӀехьдаьлар. Карарча шера Академи кхы а ший таронаш йоаржае лаьрхӀа я: керда лабораторе, робототехникан ши оагӀув хьаелларгья.
