Ца совцаш догӏаш латтарах, хин боарамга хьожаш ба мехка
Хин хьала терко лоаттаеш болх дӏахьош ба тахан Шолжа-Шахьаре. Из дувзаденна да вай мехка ца совцаш догӏаш латтарца. Геттара чӏоагӏа хиш айденна хӏама хилар кхераме лоархӏаш да юхе дагӏача цӏеношта, цудухьа боаггӏача боараме теркалде дезаш гӏулакх да из. «Сердалога» из дийцар шахьара администраце.
«Администрацерча ГО, ЧС оагӏонашца дувзаденнарех йолча моттигий болхлой ба къахьегараш. Шахьаре мехкарча кхыйолча моттигашка санна шоллагӏа ди да ца совцаш догӏаш латта, цу гӏулакхо сатем боабаьб наьха. Цу оагӏонцарча гӏулакхех йолча моттига кулгал деча Балайнаькъан Ислама белгалдечох, таханарча дийнахьа хин хьал боарамал лакхагӏа дац.
Цу юхе дагӏача цӏеношта зе хургдолаш хӏама дац карарча хана. Цу гӏулакхах болча къахьегамхоша хӏара денна терко лоаттаеш, лорабеш болх ба из, хӏаьта цхьа кхерам болаш хьал хувцалой, бахархошка эггара хьалха бергба хоам», - дийцар тха газетага.
