Коталон 80 шу дизара ди хьатӀакхоачаш латтарца, республикера моттигаш тоаеш я
Боккхача тӀема котало кхаьча 80 шу дизарца, нах дукхагӀа тӀалатташ йола республикера моттигаш тоаеш болх ба дӀахьош. Мехкадаь зарбан болх лелабераша белгалдечох, шахьара аллеяшка, скверашка, урамашка хувцамаш хургда. Наьсаре из болх дӀаболабаьб карарча хана.
Даиман йоагаш йолча цӀера, дагалоаттама мемориала тӀабода никъ болча парке хувцамаш деш боахк тахан. ТӀема юкъе моастагӀа вохавеш лаьттача 19 сагах дувцаш дола хоамий улгаш оттадергда цига. Хан-ханнахьа хувцаш хургда улгаш, къаман беррига турпалаш массанена дӀабовзаргболаш. Мехкадас Келаматанаькъан Махьмуд-Ӏаьлас белгалдечох, массаболча турпалий цӀераш йоахаш, уж берригаш бахархошта дӀабовзийташ болх лелабе беза вай.
«Коталон ден юкъе лоархӀаме дакъа лоацаш хиннаб вай мехкахой. Сага исторен чухьа эггара къизагӀа, унзарагӀа хинна, 27 млн совгӀа адам духхьал вай цхьан мехкара дӀадихьа тӀом хиннаб из. Из дицде бокъо яц вай цӀаккха а!» - язду ший вахара оагӀонашка вай Мехкадас.
