Мехкада: Шийчул чӏоагӏагӏа наьха кхерамзлен хьал дагадоаллаш вар Ахьмад-Хьажа
«Тахан 75 шу дузаш хургвар Кадыровгӏар Ахьмад-Хьажа. Кавказа таханарча исторе лоархӏаме, йоккха моттиг дӏалаьца саг ва из. Россеца цхьана йолча Нохчий республике машар, барт хьаоттабе гӏерташ, воча гӏулакхий лар хоадае гӏерташ лаьтта саг ва из. Духьале ераш дукха боллаше, тӏехьашка ца воалаш, ше лаьрхӏар кхоачашде хьожаш къахьийгар цо. Ший вахарал чӏоагӏагӏа дагабоахкар цун нах, цар кхерамзлен хьал, - белгалдир вай мехкадас Келаматанаькъан Махьмуд-Ӏаьлас. - Цхьа истори, ӏадаташ, вӏаший лерхӏам болаш хьадоагӏаш къамаш да вайдараш.
Гӏалгӏай мехкаца лерхӏам болаш, шин республикан юкъера барт, безам чӏоагӏбара тӏехьа къахьегаш саг вар из. Нохчийчен хӏама хӏара денна тоалуш латт тахан, хӏаьта Шолжа–Гӏала мехка эггара хозагӏа йола шахьар я ала йиш йолаш я тахан. Цу дерригнена тӏехьа боккха болх, денал, дукха къахьегам латт. Машар хьаоттабе гӏерташ хиннача Ахьмад-Хьажанна дезаш хиннар да из! Цо хьабена никъ дӏахохьош ва цун воӏ, Нохчий Республикан кулгалхо Кадыровгӏар Рамзан. Тахан Ахьмад-Хьажий наькъах дувца эттача вай кхетаду, из саг эггара халагӏа хиннача хана шийна дукха хӏама дӏатӏаийца дӏаэтталга.
Боккхача маьхе хилар цун машар, цхьоагӏо хьаоттаде гӏерташ хилар, цунга хьежжа эггара чӏоагӏагӏа лораде деза хӏамаш уж долга кхетаду вай», - яздир дӏахо вай Мехкадас ший телеграм-оагӏон тӏа. Нохчий къаман истореца деналах, майралах , яхьах визза вола къонах хинна ваха висав Ахьмад-Хьажа. Нохчий мехка санна, ерригача Къилбаседа Кавказе вицлургвоаца, сий дергдола саг ва из!
