СВОх дийцар вай Мехкадас, Россе герзашцарча низий министра гӏончаца Евкуранаькъан Ювназ-Бекаца
РФ герзашцарча низий министра гӏонча, эскара инарал вола Евкуранаькъан Ювназ-Бек ва балхаца дувзаденна вай мехка вена. Россе Президента Путин Владимира тӏадаьхка декхараш кхоачашдеш ва из республике.
Вай мехкадаьца Келаматанаькъан Махьмуд-Ӏаьлаца кхетаче хилар цар. Тӏема операцеца дувзаденнарех дийцар хьакимаша. Къаьстта йоккха терко еш дийцар тӏема аренашка лелача вай къаман къонгашта эшачунга хьажарах, цар дезалашта терко еш, хьашташ кхоачашдеш хиларах, гӏо дарах йола проекташ йоаржаярах.
Вай мехкадас Келаматанаькъан Махьмуд-Ӏаьлас доккха баркал аьлар тахан лоархӏаме декхараш кхоачашдеш къахьегаш волча Евкуранаькъан Ювназ-Бека.
«Вай республиканна терко лоаттаеш хиларах, доккха баркал оал аз тахан Евкуранаькъан Ювназ-Бека. Белгалде деза, тахан цо дӏахьошбар боккха, лоархӏаме болх болга, цун декхараш аттачарех доацилга. Вай къаман турпалий истори, иштта берригача мехка истори лорадара, дахаш хилийтара тӏехьа лоархӏаме дакъа дӏалоацаш ба тахан цо дӏахьош бола болх», - аьлар вай Мехкадас.
