Мехкадас баркал аьлар Россе мехкашта, кӏаьнк лохаш новкъостал дарах
Гӏалгӏайчен кулгалхочо Келаматанаькъан Махьмуд-Ӏаьлас баркал аьлар республикан, берригача мехка бахархошта. Мехка Кулгалхочо белгалдир, тӏехьарча деношка хиннача хатаро хьагойтар, бала беча юкъарло сунт хинна цхьана дӏаотташ хилар, ший беррига низ оарцагӏбаьккха, цо из бала бекъилга, яхаш, дийцар Гӏалгӏайчен Кулгалхочун, Паччахьалкхен зарбан болх лелабераша.
Шолжа хи тӏа дӏабихьача лахара-кӏалхарваккхара балхо дӏаяьккхар моллагӏа йола доазонашта, администрацешта юкъера юкъ. Цо яхачох, Гӏалгӏайчен кӏалхарваккхара болхлошца цхьана, оагӏох оагӏув теха, къахьегаш хилар, ди-бийса ца къовсаш, ерригача Россе лоӏамхой, говзанчаш. Цига дакъа лоацаш хилар Къилбаседа Кавказа лоалахарча республикашкара, Москвера, Краснодарски краера, Уралера, кхыметтел кхыча паччахьалкхера баьхка, из хатар шоай цӏагӏа нийсделча санна тӏаийца нах.
Махьмуд-Ӏаьлас белгалдир наьха барт, цхьоагӏо хилар; къамашка, динга, халача хьалашка хьежжа доацаш, ша санна шийлача хи чу лаьттар уж цхьа барт бола тоаба хинна.
«Республикан кулгалхо се хиларах тарра, аз дег чура баркал оал цу юкъе дакъа лоацаш мел хиннача боахамий, структурай викалашта, МЧС болхлошта, Росгвардена, кӏалхарбахара гӏулакха болхлошта, юкъарлон викалашта. Се саг хиларах тарра, аз баркал оал цига дакъа мел лаьцарашта, сатедеш дош аьннарашта, халача хана уж хьаллоацаш цига лаьттарашта», - аьлар Гӏалгӏайчен Кулгалхочо.
Ше кхайкарал деш, цо хоам бир, бархӏ шу даьннача Дербичанаькъан Хизара цӏи паччахьалкхен боараме даим вайна дагалаттаргйолаш е лаьрхӏа хиларах.
Иштта республикан Кулгалхочо белгалдир, ший новкъост кӏалхарваккхара цу бера карагӏдаьннар берригача мехка дахача адамашта масал хилар. Цо хьагойтар сага денал, майрал, низ. Зӏамигача турпалхочун дагалоаттам вайна юкъе даим бахаргба, лакха мах бараш вайна хьалхадоахаш.
