Мехкадас тӏадиллар республике наркотикаш йоацаш цамегаш болча наха дарба мишта ду хьажар
Гӏалгӏайчен кулгалхочо Келаматанаькъан Махьмуд-Ӏаьлас, наркотикашта духьалара болх беча комиссе кхетаче йолаш, уж йоацаш цамегаш болча наха дарба мел пайдане ду хьажа аьлар. Керттердар да, нийсдалийтача кхоачамбоацарашка хьежа а ца ӏеш, дарба даь арабаьннараш лерттӏа вахар дӏахьош бий хар. Карарча шера наджгоанцхой бетта инспектораш хьежар 12 лаьрххӏача моттиге из хьал мишта латт. Царех ялх дӏакъовлар кхерам болаш я, цу гӏулакхах йола материалаш дӏаяхьийтар, дӏахо цун чаккхе яра судашка.
«Бакъда тӏахьожама болх дӏабахьаро хьагойташ хилац, из болх мел пайда луш ба. Сона ха деза, масса саг меттавеначул тӏехьагӏа нийса вахара никъ лелабеш ва. Нагахьа санна сага ше хьа а вена, меттаоттавара новкъостал а дийха, цул тӏехьагӏа из юха а наркотикашта тӏакхувш хилар сенца дувзаденна да. Тӏаккха хаттар отт, малагӏа меттаоттавара болх ба царца дӏахьош бар», - аьлар республикан Кулгалхочо.
Цунца дувзаденна, боахамашта хьалхашка из хьал мишта латт хьажара, цох бола хоадам бара декхар отт. Цунца цхьана бокъонаш лораечарна, цу лостамагӏа болх бечарна хьалхадаьккхар шоай болх къайлагӏа лелабеш йола центраш гучаяхар, из болх соцабар.
Ӏаьдал декхарийла да бокъо луш дола каьхаташ дий хьажа, иштта прокуратураца, судаца цхьана из болх соцабе, хӏана аьлча из закон толхадеш ба.
