Бахархой лакхарча сакхетамца кхадж тассара тӏахьех Мехкадас
Федеральни, моттигерча оагӏонашцара парламентски хоржамаш да вай мехка дӏахьош. Из болх дӏабахьа къоастаяьча мехкарча 142 моттиго йиллача хана шоай наӏараш хьайийллар, кхадж тасса боагӏараш тӏаэцаш. Хоржамаш кхаь дийнахьа хургда республике. Республикерча Парламента, Россе Паччахьалкхен Думан депутаташ хила ловш болча кандидаташта хьабаьхка шоай оаз дӏаяла тоам болаш ха я бахархошка.
«258 645 совгӏа хоржамхой ба вай мехка. Тайп-тайпарча ханага кхаьча нах ба хоржам бе арабаргбараш. 15 эзар совгӏа бола мехкахой эггара хьалха кхадж тоссаш ба. 3 эзар совгӏа бола хоржамхой 90 шерал тӏехбаьннаб. Хоржамий моттигашка хьабахка хала долча, ха яхача наьха цӏагӏа кхоачашде йиш я из декхар. Хоржама комиссеш, муниципалитеташ, ӏаьдал шоайла бувзам болаш да тахан», - белгалдир вай мехкадас Келаматанаькъан Махьмуд-Ӏаьлас.
Цу гӏулакха тӏахьожам бераш, доакъашхой хоржама болх боаггӏача боараме, сабаре, бехктокхаме дӏабахьара тӏахьийхар Мехкадас. Республикан кулгалхочо белгалдир хоржамаш ӏаьдало оттаяьча бокъонга хьежжа, хоржамхошца лерхӏам болаш, деррига тӏехдика лорадеш дӏачакхдаха дезилга. Шоаш деча хоржамий дикка уйла яь, деррига техка, диста де дезилга теркалдир Мехкадас.
